Bu gün Kəlbəcər rayonunun işğaldan azad edilməsindən 5 il keçir. Noyabrın 25-i yalnız bir tarix deyil – bu, 27 illik işğala son qoyan qətiyyətin, ədalətin və xalqın öz yurduna qayıtmasının simvoludur.1993-cü ildə Kəlbəcər işğal edildikdən sonra 53 mindən çox sakin doğma yurd-yuvasından didərgin düşdü. Onlarla hərbçi və yüzlərlə mülki şəxs həyatını itirdi, minlərlə insan yaralandı, yüzlərlə əsir götürüldü və itkin düşdü. Rayonun kəndləri, məktəbləri, mədəniyyət obyektləri, tarixi və dini abidələri dağıdıldı. BMT Təhlükəsizlik Şurasının 822 saylı qətnaməsi illərlə kağız üzərində qaldı, real dəyişiklik olmadı.
2020-ci il sentyabrın 27-də başlayan 44 günlük Vətən müharibəsi Azərbaycanın müasir tarixində dönüş nöqtəsi oldu. Ordumuzun peşəkarlığı və Ali Baş Komandan İlham Əliyevin qətiyyətli rəhbərliyi nəticəsində bir neçə rayon, yüzlərlə kənd və strateji yüksəklik azad edildi. Ermənistanın hərbi-siyasi rəhbərliyi kapitulyasiya sənədinə imza atmaq məcburiyyətində qaldı.
10 noyabr 2020-ci il Bəyanatına əsasən Kəlbəcər noyabrın 15-dək Azərbaycana qaytarılmalı idi. Lakin Ermənistan tərəfi əlavə vaxt istədi və Azərbaycan humanist mövqeyini qoruyaraq, 10 günlük əlavə müddət verdi. Nəticədə, 25 noyabr 2020-ci ildə rayon tam şəkildə Azərbaycana qaytarıldı və üçrəngli bayrağımız ucaldı.
Azadlıq uğrunda döyüşən hərbi qulluqçular “Kəlbəcərin azad olunmasına görə” medalı ilə təltif edildi. Bu medallar onların igidliyini, şücaətini və xalqın minnətdarlığını simvolizə edir. Onlar Kəlbəcərin azadlığının canlı qəhrəmanlarıdır.
Azadlıqdan sonra Kəlbəcərdə bərpa işləri sürətlə davam edir. Yeni yollar, tunellər, elektrik və rabitə xətləri inşa olunur. Minalardan təmizləmə işləri aparılır, yaşayış məntəqələrinin bərpasına başlanıb. Məktəblər, uşaq bağçaları və digər sosial obyektlər tikilir. Bu işlər insanların geri qayıtmasını və Kəlbəcərin iqtisadi, sosial və mədəni həyatının bərpasını təmin edir.
Kəlbəcər Azərbaycanın su ehtiyatları və enerji potensialı baxımından strateji əhəmiyyətə malikdir. Burada hidroenerji və alternativ enerji layihələri həyata keçirilir. Dağlar, bulaqlar və mineral sular rayonun turizm imkanlarını artırır və gələcəkdə daxili və beynəlxalq səviyyədə tanınan istirahət məkanına çevriləcək.
2023-cü il iyulun 31-də Prezident İlham Əliyevin sərəncamı ilə hər il noyabrın 25-i “Kəlbəcər Şəhəri Günü” kimi qeyd olunur. Bu tarix Kəlbəcərin azadlığının, dövlət müstəqilliyimizin və torpaq bütövlüyümüzün əbədiləşdirilməsi üçün əhəmiyyət daşıyır. Hər bərpa olunan kənd, inşa edilən sosial obyekt və açılan yol Azərbaycanın qələbə və ədalət tarixinin parlaq nümunəsidir.
Mehman Davudoğlu
"24İNFO MEDİA"nın təsisçisi və baş redaktoru
